Blue Rose

موسوعتي الأمثالية ليست قوية , لكنني أحب سماعها و التفكير فيها , أغلبها يحوي حكمة و خبرة حقيقية

أما هذا المثل فقد توقفت أمامه كثيرا , أتساءل أهو درس اجتماعي يقول للأجيال أن سيئ الأخلاق هو سيد القوم أم هو تقرير لواقع أن صاحب الصوت العالي و الألفاظ السيئة هو الأقوى عادة؟؟؟

مناسبة تعرفي على المثل كانت مناقشة حول الفيلم شديد السوء عن سيدة تمتهن تلك المهنة , عملها هو ابتزاز الآخرين بلسانها الطويل لتحصل منهم على مقابل لعدم استغلاله ضدهم , و من لا يدفع يكون جزاءه كيل أقذع الألفاظ و الخوض في عرضه و عرض أسرته علنا في الشارع , و تأخذ مالا من أشخاص مقابل استخدام لسانها ضد أعدائهم أو ضد معارضيهم في الانتخابات أو أو أو

المهنة حقيقية و ليست فانتازيا سينيمائية , نساءلت لماذا أصلا يكون لهذه المراة عمل؟؟؟ من المفترض أن من يسب آخر هو المخطئ و بالتالي لو أخذت مقابلا لسب فلان فهي الخاسرة , لكن قيل لي أن من وجه له السب قد خسر كرامته حتى لو كانت هي …… ففي النهاية هو قد وجهت له اهانة

بهذا المنطق المتقبل تماما لفكرة أن يهادن الانسان طويلي اللسان دفعا لأذاهم وجد المثل و وجدت المهنة , و وجد في حياتنا أشخاص يقضون حياتهم معتمدين على ألسنتهم و معجم ألفاظ بذيئة محترم , الغجرية (ذكر أو انثى) لا يجرؤ أحد على معارضتها أو الاختلاف معها أو حتى مصادقتها , هي في كل الأحوال تعامل بما ظاهره الاحترام و باطنه التوجس من هذا اللسان

المواقف تتكرر يوميا :

ميل جيبسون يخرج فيلما عما يؤمن أنه اليوم الأخير في حياة المسيح , تخرج دعاوى بقوة أن تصوير تعذيب اليهود للمسيح هو من قبيل معاداة السامية , المرشح في انتخابات الكونجرس يتعاطف مع قتلى مذبحة في فلسطين فيتهم بمعاداة السامية , حتى يفكر الجميع ألف مرة قبل أي كلمة “قد” توحي بمعاداة الغجرية

“الداعية” النجم بطل البرنامج الهابط في القناة المخصصة للأفلام , يرفع دعوى يوميا على كل من يوجه له أو لغيره كلمة قد يفهم منها أنها مش عاجباه , لا يهم ان يكسب أو يخسر , المهم ماحدش يقول كلمة مش عاجبة الغجرية

تروي لي صديقة أنها ركبت مرة المترو في عربة السيدات و لا وجود لمقاعد خالية , يخلو مقعد بجواره سيدتين في منتصف العمر , تجلس احداهما فتبدأ الأخرى في الزعيق الغير مبرر و الأخرى تدافع و تسألها لماذا تظن أن المكان من حقها , فتنهي الأخرى الحوار بلفظ سيء , تصمت الأخرى بعد محاولات خائبة للرد (أعرف تماما احساس من لم يتربوا على السب حين يحاولون البحث في معجمهم عن كلمة مهينة) و تقوم لتقف في مكان آخر , يبتعد كل الواقفين عن المقعد فورا كأن به قنبلة تاركين المكان شاغرا للغجرية

أنا اتخنقت من الناس اللي بتستخدم الصوت العالي سلاح تاخد بيه اللي هي عايزاه حتى لو مش حقها (يتساوى في الصوت العالي المسكنة و العياط كالأطفال بردو عشان تاخد اللي مش من حقها لكن الأخيرة أرحم)
و باكره أكتر منهم الناس اللي عشان تخلص من صاحب الصوت العالي أو عشان تهديه يا حرام و مايتنرفزش أكتر من كدا تدي له اللي هو عايزه و لو اتظلم بدا حد تاني ماعرفش يسن لسانه 

one of my wildest dreams

was to swim in a cloud , i once believed i could touch the moon and swim back to earth

i was over there; above clouds, watching sunrise and eating chocolate
i closed my eyes to see myself out there
swimming in a cloud ,i can’t swim but it’s safe there, nobody drowns in a cloud

هي تدوينات كتبتها و تركتها كمسودة لم تر النور , قلبت فيها فرجعت لي ذكريات

الحر دا مؤامرة يهودية

اليومين دول مش قادرة اتحرك من البيت بسبب الحر , بارجع م الشغل فعلا مش عايزة أتحرك من البيت مهما كان المشوار اللي ورايا حيوي

فكرت طيب مين المستفيد من بقائي مسجونة في البيت و أكيد طبعا كل المصريين زيي , مالقتش غير اليهود , طبعا هم كدا مرتاحين و متأكدين اننا مش هانحاربهم لأننا مش هانخرج في الحر الرهيب دا , عشان كدا هم فكروا و تآمروا مع أمريكا و قرروا انهم يشوفوا حل يخلي الدنيا النار فمانعرفش نتحرك و نحاربهم , و طبعا استغلوا خطوط أنابيب الغاز اللي احنا وصلناهلهم , فسخنوها و هي نقلت الحرارة لمصر كلها (عشان الأنابيب دي طبعا معدن و المعدن بيوصل الحرارة ), و كدا احنا محبوسين في بيوتنا في التكيفات و هم متطمنين اننا مش قادرين نخرج عشان نطحنهم

**********************

مرتين النهاردة أسمع تعقيب ا أي شيء سلبي في حياتنا مؤامرة يهودية , مرة في نقاش عن ضعف قراءتنا و اكتفاءنا بمصادر “ثقافة” سماعية , و مرة عن التعصب المبالغ فيه في تشجيع الكرة

ماحدش بيقرا عشان في مؤامرة , و الاعلام بيروج لثقافة فاسدة عشان المؤامرة , احنا أساتذة اختراع “أفكار مدمرة أو ثقافة مفسدة” مع اننا طالما سمحنا بتحديد مصادر الثقافة , و وافقنا على وجود نظام أبوي يحدد لنا ماذا نسمع و ماذا نقرأ و منعنا من تكوين رأينا بأنفسنا , فلا فرق عندي بين ثقافة حرب و ثقافة سلام , هي في كل الأحوال لا تسمى ثقافة لكن غسيل مخ , المشكلة بقى ان في عصر السماوات المفتوحة لم يعد فرض الحظر متاحا فصرخ أصحاب فكرة الرقابة من المؤامرات لأنهم لم يستعدوا أصلا لحماية فكرهم

المية ملوثة بمؤامرة يهودية , و الأكل مسرطن بمؤمرة يهودية (طيب و مصانع الأسبستوس المسرطن ؟؟؟ طيب و الزبالة اللي بتتحرق في الشوارع يوميا؟؟ طيب و المزارع اللي بتأكل حيواناتها و طيورها بواقي حيوانية عشان تتضخم ؟؟؟ طيب و الألوان المصنعة تحت السلم بدون تراخيص لتوضع في حلويات الأطفال ؟؟؟؟)
احنا مجرد متلقي سلبي

و الأسوأ أن اعتبارها مؤامرة لم يكن بهدف الترغيب في التخلص منها بقدر ما هو رعبة في التأكيد على أنها لسبب خارجي لا ذنب لنا فيه , نكتفي فقط بالصراخ و الدعاء على المتآمر و نرجع لحياتنا , السبب مش مننا و التغيير مش هايكون مننا , هو احنا هانغير ازاي اذا كان دا كله من

صنع اليهود”لعنهم الله” , هم اللي لازم يغيروا

**************************

على الجانب الآخر الجزء الأكبر من حياتنا مشغولين فيه بتفكير الآخر فينا , ربما لهذا يتضاعف عدد الملتزمين بالمظهر الاسلامي ولا يزيد عدد الملتزمين بالخلق الاسلامي بنفس النسبة ولا حتى ربعها

حتى لما نيجي نتكلم عن الالتزام تلاقي نمرة واحد : عشان نثبت لغيرنا ان الالتزام حلو (ربما بدأ الأمر كذلك كوسيلة “للدعوة” ثم تحول لهدف في ذاته) , و مع الوقت يتضاءل الأصل , و يصبح المهم فقط هو “شكلنا قدام الناس” , فنرى الظاهرة المتكررة المظهر الملتزم مع ألفاظ خارجة لما يتنرفز ,الموظف المرتشي الذي ينهض فورا للصلاة و الناس تنتقد أول حاجة تتقال كدا بتشوه فكرة الناس عن الملتزمين (مش مهم هو جواه ايه المهم يحافظ على فكرة الناس) , أهم حاجة الناس تقول ايه

حتى على المستوى العام , لو اتكلمنا في مشكلة محاولين الاعتراف بها لنبدأ في حلها تلاقي ألف من يصرخ : كدا هانشوه شكلنا قدام الناس , مش مهم يكون فيه مشكلة في مصر , المهم ماحدش من الأجانب عشاق الفرجة على الغريب أو الأشقاء المتحفزين للشماتة يعرف و كدا احنا في السليم

و بقينا أصحاب الملكية الفكرية لتهمة “تشويه سمعة مصر”

البيوت مهم جدا نحافظ على نظافتها و نربي الأطفال على المحافظة عليها , خصوصا الصالون لأن هو دا اللي الناس هاتشوفه , لكن الشوارع مش مهم قوي المحافظة عليها , ماحدش هايعرف مين اللي رمى الحاجات دي هنا

اللبس (عقدتي دي) الناس لازم تتشيك جدا و هي خارجة , طبعا أمال الناس تقول علينا ايه , لكن في البيت حدث ولا حرج , مش مهم مادام الناس مش هاتشوف

حتى أخلاقنا أصبحت للتسويق أمام الناس فقط , يمكن عشان كدا كل شوية حد يشتكي ان شريكه بعد الزواج طلع شخص مختلف تماما , لا اراديا احنا اتعودنا اننا نلبس قناع يعجب الناس , نقول اللي يحبه الناس و لو مش مقتنعين , ربما لهذا يصعب التغيير جدا , لأننا أصلا لا نرى مشكلة الا

في مظهرنا و هو ما يسهل اصطناعه و لسنا مضطرين للتغير داخليا

الأخلاق نفسها لما خضعت لمعايير “كلام الناس” و ليس لمعايير الصواب المطلق أو المعايير الدينية فسدت , يعني دلوقتي بقى اللي مش بيغشش زمايله في الامتحان ندل و أناني , و اللي مش بياخد رشوة مع زمايله مخه مقفول , و طلع من امثالنا مثل ساءني جدا لما سمعته “البلد اللي ماحدش يعرفك فيها اعمل فيها اللي انت عايزه” , لا أخلاق و لا ضمير فقط خوف من الناس

هي دعو لخلع القناع
و لتغيير التراث : كل اللي يعجبك و البس اللي تقتنع بيه

BlueRose

29/6/2007

عشان تكون مفكر تبعا للتقاليع الجديدة الحكاية بسيطة , أي حاجة تتقال محسوبة على الحكومة أو المنتمين للحكومة صرخ و قول غلط , و لو حد كلمك أو لو سمعت قال حاجة تانية صرخ و قول له انت مع الحكومة و كلمه على انه من “معسكر التانيين” و مافيش منع تقعد تزن و تقول أصلي باحب الغلابة و خايف عليهم  و انتوا بتكرهوهم و مضطهديني عشان باحبهم

مش لازم تكون فاهم أصلا مناسبتها أو حتى عارف معناها , مش محتاج تدور وراها , هو كدا الموضة الصريخ , هاتمشي عكس التيار ولا ايه؟؟؟؟

صحفي حضر محاضرة للمفتي في كلية

سؤال : هل الضحايا  الغارقين على سواحل ايطاليا شهداء؟؟؟

و على اعتبار أن أي كلمة تخرج من فم المفتي فتوى شرعية استعد الصحفي للعنوان البادئ بكلمة “فتوى”

إجابة1 :  نعم (ياخبر : المفتي بيقول للشباب ارموا نفسكوا في البحر , يا عشتوا كويس يا بقيتوا شهدا)

إجابة2 : لأ (نعم؟؟؟ هو المفتي بدل ما  يلوم الحكومة على البطالة بيقول انهم مش شهدا؟؟)

إجابة 3 : لا أعلم (امال مين اللي يعرف ؟؟ يعني لما نحب نعرف فتوى نعرفها من مين ؟؟ ولا هم بتوع الأزهر مش فالحين غير في تأييد الحكومة و بس)

عقلي الباطن : هو الشهيد محتاج صك غفران من الأرض؟؟ طيب هو كلمة مش شهيد دي تكفير مثلا يزعل؟؟؟ هو مين الغبي اللي بيسأل واحد فوق الأرض على مصير واحد تحت الأرض؟؟؟ هو فيه أنبياء دلوقتي يحددوا مين الشهيد و مين في الجنة و مين في النار؟؟؟؟

احنا عايشين في المية , و المية حنينة , لكن الأسفلت دا , الجامد , الأسود , بيخلي اللي عايش عليه غلاوي

العلام بيفتح المخ  , بس تفتيح المخ بيخلي البني آدم نكدي  , عشان بيعرف حاجات  في الدنيا تخليه كدا , انما الجاهل  …  مرتاح

من فيلم المراكبي

أفقد أحباء فقدا لا عودة منه , أظل اياما أو شهور اكابد افتقادهم , وقتا يزداد طرديا مع قربهم , أراهم في كل مكان لي معهم فيه ذكرى , أفتقدهم في كل وجبة آكلها دون وجودهم , و في كل ضحكة أضحكها تذكرني بضحكات كانت معهم

مع كل رائحة تأتي للموت  , تعيد اليّ  أول ما تعيد ذكرى من أحب , فأعود لاحساسي بالافتقاد
أحاول تذكر كم احتجت من الوقت لأتمكن من التفاعل مع العالم دون ان يمنعني افتقاد أبي من ذلك, لا أذكر الوقت , كانت شهورا طويلة , لم أحسب عددها

مذهولة أنا من افتقاد يغمرني لمن لم يكن لي معه ذكرى واحدة ذات قيمة تذكر , لا أتذكر يوما كانت لي معه فيه ذكرى
نعم كانت حياتنا اليومية في نفس الأماكن , ربما هو ليس افتقاد قدرما هو معايشة , درسنا و عملنا في نفس الأماكن و مع نفس الأشخاص , و خرج هو في مشوار أقوم به دائما , و لم يعد لهم

و أعود لمنزلي لا أفكر سوى في شيء واحد …….. نعمة هي وجود أمي

و أدعو …… لمن فقدتهم و من فقدهم غيري

اللهم ارحمهم

تمر7 سنوات و أنا طالبة في نفس الكلية , أراه كثيرا , تجمع بيننا الدراسة و سنة الامتياز و أصدقاء مشتركين كثر لكننا لم نكن يوما صديقين
أكتفي برد السلام كلما رأيته , لا أرتاح له كثيرا , سخيفة أنا؟؟ لم أفكر , فقط هو ليس صديقي

تنتهي الدراسة , و للصدفة نعمل في نفس المكان , لا جديد , لسنا صديقين

أترك تليفوني في المنزل كالعادة و أذهب لصلاة الجمعة و أعود لأجد مكالمات و رسائل أكثر من الطبيعي , افتح الأولى لأجد خبر وفاته و موعد جنازته
لا اعجب من صدمتي من الخبر , لكن يفاجئني حزني الشديد عليه , أذهل لدموعي التي لا أعرف اهي حزنا عليه , أم ماذا
في محاولة للتخلص من حزني , أقول لنفسي أنني لا أعرفه جيدا , فأجد نفسي تتساءل : هو ليه ماكناش اصحاب؟؟؟
أقضي يومي كله في حزن
دون تركيز كبير .. أدعو له

في آخر أسبوع في رمضان … رأيتهما

قبل الفطار بحوالي الساعة

في مركب واحدة , تمسك هي المجدافين بينما يلقي هو الشبكة في النيل

على الأرض أقف أنا و صديقتي بالكاميرا

نظرا إلينا للحظات

ابتسمت هي , و عاد هو الى شبكته بلا اكتراث

لا أظنني سألقاهما ثانية , لكن لن أنسى لهما ذكرى إحساس جميل منحاني إياه للحظات

الصورة بعدسة نفرتاري